Tangon Kadazandusun: I Dongkor

Sinusui di: Kondusun Gilong (2005)

Haro-haro no kaka i Dongkor. Ogumu kaka kinaandadon dau nosusu miagal di Lonu om i Lintagu. I Tapa nopo kaka di Dongkor dii nga napatai no om ii no tina dau o pinapagayo dau mantad di okoro po. Ii nopo koombolutan ngawi di Dongkor dii nga nangkasawo ngawi no kaka nga amu po nakasawo i Dongkor tu noindamaan do momili.

"Manansawo nopo indo oi Oton. Molohing oku no moti diti om aiso mogobi-obi", kaka di molohing di Dongkor nga amu i kaka di Dongkor mumboyo.

Ogumu no kaka daa sumandak nokito di tina di Dongkor nga mada i Dongkor.

Insan tadau, pomonsoi no kaka do kasip o tina di Dongkor om ngoyo no disido pataano' do hilo id gouton. Bayahan tu' haro kopio o paus do nokosulung nga pinologos dii molohing di Dongkor gisom do nokoutong om giniukon. Soira do nouruan do giuk ii paus dii, ngoyo no kaka di molohing di Dongkor saano' om nongoi posuango' id linimput todopon di Dongkor.

Otuong no kaka dii om norikot no o timpu kaadapan. Sunudai no kaka di tina di Dongkor do haro o sumandak sompogunan (ii paus) hiri id todopon di Dongkor. "Hodia oi Ongkor. Haro no tondu sompogunan do nokito ku nga mongoi ko nopo odop om kada kotogod nung ogura no", kaa di tina di Dongkor.

"Uu no katuu Ina", kaka di Dongkor.

Soira do minongoi i Dongkor odop, potingkuluput kaka gia ii sumandak do sompogunan dii. Au kaka minomikomi ii Dongkor tu au daa yau orohian do pinoguhuman di molohing dau do sumandak. Sigog kaka nga kopuriman kaka ii Dongkor do akarau.

"Kada bogia kogura kopio oi Umandak", kaka di Dongkor tu' amu no katahan do adalaan akarau.

Ongosuon no ngawi kaka gia do giuk o tolingo, todung om munung di Dongkor.

"Tolingo ku po daa nga ongoruluk ngawi", kaka di Dongkor do noindamaan oihitian.

Mangai no kaka Dongkor padalaai do minonumbuk ii sumandak sompogunan dii kasaalom nopo kaka tonggom di Dongkor do hiri id tinan do paus di nomomos no dii.

"Hodia oi Ina.. Mogidu oku no moti diti do ogura kopio ilo sumandak om tumbukai ku no yoho yo. Au oku i milo om amu napatai ii", kaka di Dongkor.

Pogidu no kaka i Dongkor mantad hiri id walai dau kuminaa id gouton. Tingkosuab no kaka dii nga ongoi no kaka i Dongkor awang id bawang di awayaan do tulun ginumuan do mindahu tu' mokiuhup kaka yau poporomut pason kumaa di molohing dau.

Haro no kaka di nakawaya do minindahu om sunudai no di Dongkor. "Sunudan no doho i Ina om ngoyon oku no porulunai takano do louson oku no kopio ka nondo", kaka dau kumaa di modtinalib.

Tingkosuab nodii, sinitai tomod kaka i tina di Dongkor om ongoi no kaka yau tai miampai minaganu do roun tintap minaan pomolopot do tai dau. Ngoyo no kaka dii dau poruluno' id bawang ii linopot dii.

Hiri po kaka sarayo nga kokito no di Dongkor do murun-rulun no o linopot. Tungakabangai tomod kaka dau om tilombusai nopo kaka dau minoningab ii linopot di.. NGA..... Osilou nopo kaka gia hiri id kabang di Dongkor.

“Pogkuro gia di ina do louson tomod oku nogi om tai nogi kopio nooi poruluno” ka dau. Oruol tomod kaka ginawo di Dongkor tu okon ko takano i pinorulun dii tina dau.

 Katalib no kaka wakagu ii minindahu om pomisunud po kaka kawagu i Dongkor.

“Sunudan no doho kawagu i Ina dii do poporulun doho takano tu' i' noingoi dau poruluno”, kaka di Dongkor.

Kosuabon kaagu no kaka di om  pomirakan no i molohing di Dongkor. Agayo kaka rinakan disio tu maan kaka dau porulunon montok di Dongkor.

Lopoto' no kaka dau do roun tintap om kinagasan do lamba miampai pinoporulun dii takano id bawang.

Hiri po kaka id sarayo ii linopot dii nga nakataradai no i Dongkor watu tu andasan dau om tai kasari  i pinorulun.

Kahapak kopio kaka  dau ii linopot dii nga dunsongo' no dau. NGA... Opurak nopo kaka ii takano do nourias.

Pikaratabpaai kaka di Dongkor ii irad po do tonggom tu sonrulun-rulun dii i takano di no nourias. Tindal no kaka i Dongkor id sakai watu do minakan. Potogindang kaka i Dongkor hiri id sakai watu dii om aiso nogi kaka o sorual dau. Koluungai kaka di Dongkor o tompok do tontolu dau nga haro kaka o mumu' do takano. Otogod kaka i Dongkor do nokokito takano dii.

"No, nga sala kanto gia amu oku nayahan do minakan nga iya nga minakan i'!", kaka di Dongkor miampai minomoduntuk do watu dii tontolu dau. Om tilombus nopo kaka napatai i Dongkor tu nadalaan do norualan. 

Om iri-iri no.